發叔想搵阿仔接主席？

【明報專訊】76歲嘅劉皇發，雖然今屆冇做行政會議成員，但仍身兼鄉議局主席、立法會議員、屯門區議會主席等公職，鄉議局仲係由1980年做到家成32年，呢屆任期仲有兩年幾，好多人都睇住發叔係咪真係退。聽聞佢老人家真係覺得要懂得放下，正在為邊個接班而苦惱咁講。


正路嚟講，鄉議局主席應該由現時兩個副主席其中一人接班，政圈消息話，林偉強過去因涉及財務問題，老友亦唔係好多，早已經唔受發叔關照；張學明就似乎對主席一職野心唔大，而且佢戴咗民建聯頂帽，有兩重角色，未必令鄉事各派系接受。


接班有「四大要求」

發叔最近喺飯局同人講，話主席個位就算畀張學明佢都未必敢做，事關要擺平各方勢力真係唔易，而且仲係要義務，要貼唔少錢。咁樣講，點先至有條件做主席？發叔話要有經濟能力、熱心、人緣、識得同政府打交道呢「四大要求」咁話。


要有齊咁多條件，去邊處搵人？係咪意味極有政治手腕嘅發叔唔使退？發叔就話，其實佢兒仔劉業強都有諗過，又搵老竇傾過，但究竟係咪由阿強接任主席，發叔就唔肯評論。其實，發叔近年都有畀機會兒子樹立功績，例如09年屯門迎國慶煙火匯演，就交由阿強統籌，甚至傳出發叔曾經諗過，將今屆立法會鄉議局功能界別議席由阿強接任，只係後來遇到反對而告吹。有人就話，如果發叔想要搞世襲，肯定會遇上極大阻力。