黎桂康周俊明 退任中聯辦副主任

【明報專訊】官媒中新社噚日報道，國務院日前發出通知，中聯辦兩名副主任周俊明同黎桂康（圖）將會退下來，因為佢哋超過中央規定嘅任職年齡界限。周俊明同黎桂康都係2003年7月1日之後無耐嚟香港做中聯辦副主任，至今超過9年。


未必要人補上

中新社並無講有無人嚟接任副主任，不過，有政界人士同Emily講，中聯辦無特別規定要有幾多個副主任，所以未必需要填補。過去兩年，中聯辦多咗3名副主任，相信係周俊明、黎桂康過咗立法會選舉之後，可以功成身退。實際上，2010年底調嚟香港嘅殷曉靜，已經逐步接手緊黎桂康嘅工作；而力捧立法會議員梁美芬上位嘅副主任林武，則主力接周俊明嘅工作。


周俊明同黎桂康退休後，中聯辦副主任有7人，除咗公眾見得比較多嘅李剛，以及林武、殷曉靜，仲包括郭莉、黃蘭發、王志民及楊建平。