CY周五出差 暫別傳媒唞一唞

【明報專訊】特首梁振英畀個僭建大宅搞到一頭煙，日日被傳媒追訪，但佢終於可以避開一下，周五（30日）會率領政制及內地事務局長譚志源等官員，去海南島三亞出席「第八屆泛珠三角區域合作與發展論壇暨經貿洽談會」，周六下午就會返香港喇。


上任至今只去過廣州

CY上任4個月，除咗去過一次廣州，都無機會訪京（唔計上任前）或者外訪，今次去三亞已經算去好遠喇。佢身邊嘅人就話，佢唔係「被軟禁」喺香港，而係上任頭3個月忙於政事，家都係時間外訪。


「門常開」呢期都幾多司局長驛馬星動，輪住北上。保安局長黎棟國已經喺北京見公安部官員，周四返嚟。發展局長陳茂波都暫時要放低處理上司嘅僭建事件，因為佢都要喺周四拉隊上京見相關部委。


律政司長袁國強今日起訪京3日，佢會同最高人民法院、司法部、外交部、港澳辦等部委官員見面，議程係加強同內地喺司法及法律事務嘅了解，Emily就關心，司長會唔會同京官講近期司法界最關注嘅，係佢哋好驚香港嘅司法獨立受干預。