林鄭惜住公務員

【明報專訊】政府話要研究使唔使搞標準工時，政務司長林鄭月娥就話，唔想公務員好似佢咁辛苦，工作要輕鬆啲。不過，唔少人同Emily講，林太一向係打工仔「壞榜樣」，日日勤力做到瘦，佢接受《公務員通訊》訪問，人哋問佢有乜消閒活動，佢就話鍾意去郊外舒展一下，因為香港風光如畫。佢回味兩年前請咗一日假，同大仔去米埔濕地睇雀仔，可惜自己工作太忙少時間陪家人，幸得家人體諒。


林太同丈夫分隔兩地，今個月初佢喺中文大學活動上話渴望有一個肩膀可似依靠。佢接受《公務員通訊》訪問時話，好感謝丈夫同家人，但係睇番日誌上密麻麻嘅工作，要每日完成都有啲匪夷所思，而呢啲工作有時會影響情緒，有時掛住做嘢，同家人傾偈時都心不在焉。


想畀多啲空間各部門

林太話唔想公務員咁辛苦，必須畀佢哋輕鬆一啲，要對公務員多啲體恤，但就唔一定係加錢加人，而係可以畀多啲空間各部門，例如簡化採購程序，唔使全部由中央採購咁煩瑣。


佢話家主力幫梁振英搞扶貧，話仲有人住喺板間房同籠屋，實在可悲，話政府應優先處理呢啲問題。