阿人鐵漢柔情煮私房菜籌款

【明報專訊】工黨主席李卓人平時上街示威同喺立法會內向官員發炮嗰陣咄咄逼人，形象剛強，但佢噚日為工黨籌款，展露柔情嘅一面——穿起圍裙，親自買餸炮製私房菜。


阿人噚日開完立法會之後去咗買餸，再去北角煤氣公司廚房下廚，希望以手藝答謝早前向工黨合共捐出咗5萬蚊嘅地產及建造界議員石禮謙同埋煤氣公司，佢話想藉此體驗勞動階層嘅辛勞，向佢哋致敬。


超豪菜單體驗勞動階層辛勞

Emily睇咗阿人個菜單，同高級西餐廳嘅可以話係不遑多讓，總共有6道菜，包括牛油果香橙沙律、吞拿魚沙律同埋羊架等，甜品係法式焦糖燉蛋，其中幾個菜式嘅名仲係用意大利文寫。嘩，咁高級菜式，似乎同勞動階層平時食開大相逕庭！阿人就解釋，今次煮豪餐亦無衝突，事關低下階層都係日夜勞動，煮服務有錢人。