鮑晏明升任上訴庭法官

【明報專訊】馬道立接掌司法機構後，升咗大批法官，可以話係回歸以來最大型嘅一次。前日，司法機構宣布委任專門審理公司法案件嘅印度籍原訟庭法官鮑晏明（53歲）為上訴庭法官，係今年第4名升任上訴庭嘅法官。


今年司法機構先後升咗霍兆剛、朱芬齡同林文瀚做上訴庭法官。唔好睇鮑晏明滿面鬍鬚，好似好惡咁，和善嘅佢，係Emily見過講嘢最斯文嘅法官，而且對大律師同與訟人好友善，Emily從來未見過佢喺庭上鬧人。鮑晏明升咗職都要繼續「戥腳」，專責處理原訴庭嘅海事案件，就好似林文瀚升咗職，仲要負責審司法覆核案咁。


不過，Emily知道司法機構即將一口氣委任3名私人執業資深大律師加入高院，林雲浩（53歲）將接替林文瀚專門審理司法覆核案件，其餘兩人係資深大律師陳健強（52 歲）、吳嘉輝（49 歲）。落實咗嘅話，各位法官就可以唔使咁辛苦啦。


鮑晏明喺牛津讀法律，1983年起喺香港私人執業，2002年升任資深大律師，03年做原訟庭法官。