盛品儒再講眾所周知

【明報專訊】最近嘅免費電視大戰鬧得滿城風雨，人氣勁爆嘅亞視執行董事盛品儒噚日又開記招，雖然今次終於講啱「眾所周知」，無好似上次記招咁個「周」字講甩音，變成粗口字句，但喺記者會上佢都被考起，有記者想搵佢用英語答問，但佢就即刻耍手擰頭話要講番廣東話。


上回誤講粗口

盛品儒周一記者會誤講粗口後，噚日一出場，即刻加重語氣咁讀「眾所周知」個周字，之後仲重複多一次正確讀法，似要向粗口說不。


有記者想盛總用英語答問，盛總即刻耍手擰頭話佢之前已經解釋過呢條問題；嗰位行家再要求盛總用英語答一次，盛總唯有講句，「對不起，我想用廣東話解釋（sorry...I, I, I want to explain in Cantonese）。」


「王征」出現又消失

Emily仲聽聞記者會開始前，一眾行家到達錄影廠，發現只係預留咗一個位畀盛總，後來工作人員好大陣仗咁搬多6個位出嚟，其中一個仲要係留畀亞視主要投資者王征。當大家滿心期待又有跳舞睇嘅時候，工作人員又收番嗰幾個位，搞到行家失望之餘，亦反映安排混亂咗少少。


講開亞視，早前一人力戰百藝員、單挑去抗議嘅網民曾慶光，噚日又去「包圍」亞視，自備兩個紙牌高呼「反對亞視人格謀殺王維基」等口號，叫盛品儒唔好再人身攻擊王維基。場內場外各師各法鬥有趣，足夠拍番套《香港電視台風雲》。