「小心新巴」假通告 九巴報警

【明報專訊】呢期接連發生巴士車禍，包括上星期柴灣道造成3死57傷嘅嚴重事故，前日灣仔菲林明道巴士相撞亦造成56人受傷，無獨有偶兩宗意外都係新巴撞九巴。噚晚就有網民喺討論區張貼「文件」，聲稱係九巴內部通告，入面話因近日接連有新巴撞九巴意外，要求車長駕駛時要時刻警覺，尤其「特別留意新巴巴士」，以免發生意外咁話。


呢份「文件」有齊九巴logo同簽署，同一般九巴文件格式一樣，驟眼睇Emily都信以為真。不過，九巴噚日即刻發表聲明話呢份文件「內容全屬虛構」，九巴從未發放過，又話好重視今次偽造事件，因為事態嚴重，有可能引起不必要恐慌，九巴已經報警處理。


九巴話，內部通告係公司向員工傳達信息嘅主要渠道，如果有人喺網上發放假信息，不但混淆視聽，仲可能影響車長駕駛嘅判斷，危及乘客安全，要嚴厲譴責呢啲行為。九巴又話兩宗意外都係獨立事故，面對巴士艱難嘅經營環境同惡劣嘅路面情况，業界一向互相扶持，「不存在彼此排斥提防」喎。