政總部分將「木門常開」

【明報專訊】新政府總部啟用年幾以嚟，相繼有記者行家採訪時畀保安員阻撓甚至發生衝突，政府方面話已有相應措施方便記者出入，仲已經展開工程，喺通道上嘅木門加設裝置令「門常開」，方便揸「大機」嘅行家出入。


過去一年幾，曾經有3名記者，包括Emily嘅同事被警方當賊扮，扣留7小時調查；仲有攝記喺西翼閘口外行人路上等採訪時任教育局長孫明揚嘅時候，被保安阻撓，發生肢體衝撞，搞到行家叫苦連天。政府噚日喺立法會上回應話，已經喺東、西翼大堂設立固定採訪區同貫穿兩翼嘅記者通道，方便採訪；行政署同香港記者協會商討後，仲計劃喺通道上嘅部分木門加設電動裝置，令佢哋可以喺非緊急時候保持開放，方便揸大機嘅行家出入。工程已經展開，預計年底前完成，但西翼入口基於安全考慮，始終唔能夠開放畀記者。