高永文幫病人打變靚針？

【明報專訊】DR醫學美容集團幫人做靜脈輸液後搞出人命，公眾對美容醫療有保留。巿面有美容中心替顧客做PRP療程，從血液中抽取濃縮血小板再注射入面部，話可以令肌膚靚啲，香港醫院藥劑師學會就話無足夠實證支持呢種講法。而本身係骨科醫生嘅食物及衛生局長高永文醫生就向Emily自爆，話佢以前成日幫人打PRP，但佢就叫Emily千祈咪誤會，佢唔係幫人變靚啲！


高醫生話，佢做局長前係私人執業骨科醫生，嗰陣都有同病人注射PRP。資料顯示，其實係用血小板幫體內組織修復；而骨科採用PRP，係用喺關節康復科。


用PRP醫關節

高醫生話，佢只會幫病人喺手肘、肩膀位置注射，唔會亂咁打。佢仲話，美容中心幫病人做PRP，要收萬幾蚊，真係難以置信，佢以前幫人打一針都係收2000蚊，當中千幾蚊仲係用嚟租嗰部重甸甸嘅血液分離器。