陳茂波訪京公聽會或缺席

【明報專訊】早前新界東北計劃掀起唔少爭議，立法會聽日舉行公聽會，聽取團體意見。不過，現時身處北京嘅發展局長陳茂波聽日下晝至返香港，相信唔能夠出席會議。已經報名嘅土地正義聯盟執委朱凱迪梗係失望，批評陳茂波早知會舉行公聽會，都唔預留時間，唔係太尊重民意。資料顯示，陳茂波周六好似無官方活動，朱凱迪就建議，不如局長今晚坐夜機返港，聽日一齊開會。


團體促搭夜機趕返

Emily聽聞今次公聽會報名相當踴躍，現時已有260人登記出席，所以立法會決定，會議除咗由上晝9點開到下午6點，仲會喺12月15號加多一場，實行要畀每個團體都有機會發言。Emily就希望市民嘅意見有人聽到，唔會變成「口水會」。