CY唔講僭建講3P

【明報專訊】僭建醜聞纏身嘅特首梁振英（CY），噚日喺中環遮打道出席「匯豐社區節」活動，不過CY就僭建問題完全封口，唔知想拖到幾時。佢噚日出席完活動離開時，雖然現場有多名記者提問，但CY無回應就登上座駕絕塵而去。


CY唔講僭建，但喺活動致辭時就大談企業「3P」理論。3P即係咩呢？大家咪「思歪」，佢話企業對股東嘅責任係「Profit（利潤）」，但係企業對社會嘅責任仲有另外兩個P，就係「People（人）」同「Planet（星球）」，即係承擔對人民同環境嘅責任。


匯豐銀行今年撥出1800萬推出「匯豐社區伙伴計劃」，資助福利機構喺全港18區舉辦地區特色嘅社區項目，至今合共資助265個項目，估計受惠人數逾44萬。CY致辭時話，匯豐呢個計劃嘅發展係由下而上，由地區人士主導同策劃，同佢喺競選時提出嘅「地區問題、地區解決，地區機遇、地區掌握」如出一轍咁話，佢又希望呢個計劃可以推動商界積極承擔企業社會責任。


民陣計劃元旦遊行倒梁

另外，民陣召集人孔令瑜話計劃發起元旦大遊行倒梁，今日會正式向警方申請不反對通知書，同埋睇吓有冇場地搞集會。不過，網上已有不知名者設計咗海報，話元旦要遊行倒梁。