夢熊：嚟香港唔係為面旗

【明報專訊】全國政協委員劉夢熊係反港獨嘅先鋒，佢噚日喺旺角出席公民黨毛孟靜（Miss Mo）主持嘅街頭論壇時，繼續炮轟示威者舉起代表殖民時代嘅龍獅旗。但有現場觀眾發言時嘲諷劉夢熊，話佢當年都「棄暗投明」，游水偷渡嚟仲係英國殖民地嘅香港啦。夢熊聞言反駁，話佢當年只係為咗投奔自由，覺得香港當時有自由、法治，絕對唔係為咗面龍獅旗而嚟香港咁話。


另外，劉夢熊又喺論壇批評中央政策組首席顧問邵善波，話佢公開表明要打「輿論戰」，係政治唔成熟嘅表現。


自己入中策組「大材小用」

主持Miss Mo忍唔住追問夢熊，係唔係覺得特首CY應該要搵佢做中策組首席顧問先至啱呢？點知夢熊好幽默咁話搵佢做係「大材小用」喎。Miss Mo聽到後笑到停唔到，唔知夢熊心裏面覺得自己應該出任乜嘢崗位，先至適合大材呢？