《兒童樂園》羅冠樵出殯

【明報專訊】香港第一本彩色兒童畫報《兒童樂園》，對上世紀五六十年代嘅人嚟講唔會陌生，畫報嘅創辦人兼前主編羅冠樵上個月去世，享年94歲，噚日出殯，約70個羅生前嘅學生同好友出席追思會，扶靈名單包括陶傑、尊子、一木、馮志豐、阿虫、馬龍、盧子英同黃嘉文，佢哋都係《兒童樂園》嘅讀者。


諗過出功夫書「導人向善」

《兒童樂園》另一前主編張浚華女士憶述羅冠樵非常愛惜《兒童樂園》，例如當時人手唔夠，成日脫期，一班畫家諗住「畫少幾筆」盡快出版，但羅冠樵就堅持要用心畫畫。而佢個仔話爸爸教佢哋要謙卑，又話爸爸覺得《龍虎門》教小朋友暴力，希望可以出一門「導人向善」嘅功夫書抗衡《龍虎門》。


羅冠樵於1953年創辦《兒童樂園》，當中創作咗《小圓圓》、《西遊記新編》等著名作品。佢亦曾任教華僑書院、經緯書院等，仲先後組織香港中國畫協進會同香港中國人物畫協進會。