梁卓偉：無掛住從政日子

【明報專訊】喺前朝政府做完食衛局副局長又做過特首辦主任嘅梁卓偉，噚日重出江湖，今次身分唔同晒，唔單止係教授，仲升職做港大社會醫學系系主任。家陣政府呢個熱廚房愈燒愈熱，無官一身輕嘅梁卓偉就話﹕「無miss（掛住）以前，唯一miss嘅係舊時啲同事！」


佢話，睇住近排發生嘅事，都估到舊同事有幾辛苦。雖然佢家唔使再做政治工作，但係都好唔得閒，工時同以前差唔多，只係唔再喺鎂光燈下面，大家唔知佢有幾辛苦。


「唯一miss舊同事」

好似佢噚日出嚟，就係介紹佢做官之前已經開始咗嘅研究，呢個研究係一個大project，歷時5年跟進，研究對象要成4至5萬人，好似社會探熱針，可以睇吓邊區多肥仔，又可以睇到各區嘅貧富懸殊情况，仲可以睇埋港人有幾快樂。呢項研究噚日公布一部分，重點嘅將會喺未來幾個月分階段陸續公布，大家要等吓喇。


盼創社會探熱針

梁卓偉要調查港人嘅快樂指數，咁佢有幾快樂呢？佢話自己「自得其樂」。至於佢哋個社會探熱針，會唔會搵到邊區發緊燒呢？佢即刻引用《黃帝內經》，話要「治未病」。


無論做官定做系主任，梁卓偉都咁識講嘢，佢嘅快樂指數有幾高真係估唔到，但係佢嘅「語言藝術」一定唔低分。