罐頭砌聖誕老人

【明報專訊】雜菜湯係身，白腰豆係塊面，沙甸魚係嘴，呢個8呎高嘅聖誕老人係新生精神康復會嘅傑作。佢哋早排參加慈善罐頭裝置比賽，向會員籌咗2萬蚊，買2200個罐頭，又疊又砌完成呢個作品。展出後，罐頭會捐畀食物銀行，幫助有需要嘅市民有個溫飽嘅冬天。


展後罐頭捐食物銀行

有份參與嘅新生精神康復會行政主任劉銘傑（Keith）話，資金有限，即使用批發價向供應商買罐頭，都要諗過度過，「午餐肉閒閒哋賣十幾蚊」，除咗要格價，仲要揀選顏色包裝適合嘅罐頭，因為聖誕老人以紅色同白色為主嘛。


Keith仲話，開頭以為將全部罐頭疊起好易，但落手落腳做就發現有難度，稍一不慎，罐頭陣就會倒塌，成擔心機無晒。後來佢哋向朋友偷師，用鐵線綁實罐頭，又用木板同膠喉固定位置，呢個由罐頭組成、食得落肚嘅巨型聖誕老人終大功告成！


精神病康復者陳茹清話，康復者除咗畀人幫之外，都希望可以幫人，佢雖然喺庇護工場打工，收入唔多，但略盡綿力捐咗幾十蚊買罐頭，呢種態度值得Emily大讚。