少年Pi驚變少年CY

【明報專訊】被僭建醜聞搞到周身唔得閒嘅特首梁振英（CY），早前出席總商會活動時，呼籲商界代表，若見到阻礙政府施政嘅人就要「shout at them」（喝止佢）。呢句「shout at them」近日變成金句，仲畀網民攞嚟key咗上呢排熱爆嘅《少年Pi的奇幻漂流》電影海報上，實行二次創作。


網民將少年Pi個樣換成CY個樣，搞到CY變成一個紮住頭巾、赤膊、揸住個鏟企喺救生艇嘅印度少年，旁邊有隻同少年Pi鬥生鬥死嘅孟加拉虎，海報上加上CY名句「Shout at them！」，係人睇見都想笑。


唔知套戲嘅導演李安睇見網民將佢嘅電影海報咁樣惡搞，會唔會都「shout at them」呢？

CY金句被惡搞成唔交稅理由

講開CY，佢喺僭建醜聞拋出唔少驚嚇十足嘅金句為自己開脫，例如係「僭建處理咗就唔存在」、「適當時間會作適當回應」等。有高登仔將金句發揮得淋漓盡致，將佢哋變成唔交稅嘅抗辯理由。


如何逃避稅局嘅綠色炸彈？根據CY嘅邏輯以及高登仔創意，你可以同稅務局講﹕「稅單放入垃圾桶後，交稅嘅問題便不存在喇。」亦可以話，「交稅同唔交稅有好大嘅討論空間」、「我第一次收到稅單，唔知道要交稅」。如果想惡啲，你可以話﹕「若有人阻住我有效儲錢，我會大叫『shout at them』。」當然，亦可以話自己記錯或高呼交稅一向由太太處理；亦可重複使用呢句名言﹕「我要翻查一下資料，適當時候會有適當回應」。


「稅單丟咗便不存在」

你更可以嘗試引用「頭號梁粉」行會成員羅范椒芬嘅邏輯，「大」番稅局轉頭，話若果人人收到稅單都去交稅，稅局係會處理唔切。


不過，Emily提提大家，唔交稅係犯法嘅，除非你夠膽講﹕「遲交稅後，可能已進入司法程序，我現階段唔會繳交任何稅款或作出回應！」