兩新政助去立會social

【明報專訊】新一輪獲委任嘅政治助理陸續返工，立法會係政府工作主要戰場之一，所以噚日星期三立法會舉行大會，亦有唔少政治助理現身，認識下記者之餘，更重要係同議員打吓招呼。好似財政司長政助羅永聰及返咗工3日嘅食物及衛生局政助陳凱欣，噚日都有喺立法會social一番。


無收工時間可言

陳凱欣喺立法會被問到返新工慣唔慣，話由傳媒人轉做官員，目前仍然處於學習階段，又話只係返咗幾日工，所以同副局長陳肇始都未有具體政策分工。咁呢幾日有無需要加班呢？阿欣就好識答咁話，佢哋其實無收工時間可言，所以就算幾點收到工，都唔算加班喎。


其實噚日政務司長政治助理張秀麗都有跟隨司長林鄭月娥現身立法會，不過佢只係一閃而過，然後立即行返入記者去唔到嘅地方喇。