手機下載冊子導覽香港

【明報專訊】政府成日諗宣傳香港，由政府新聞處製作嘅最新一期《見．識香港》小冊子，除咗網站，更可以喺iPad、iPhone或者Android系統上使用，大家可以免費下載呢本小冊子。政府話，小冊子嘅地圖導覽功能勁咗好多，可以透過標示針，睇到港、九、新界同離島嘅好去處，只要撳一下標示針，仲可以睇到相關地點嘅資料。


今次新版本亦新增「擴展實境」功能，啟用之後，只要將電話、平板電腦嘅鏡頭聚焦喺目標地方，若果探測到嘅目標喺使用者身處300米範圍內，而小冊子又有記載該地方資料，程式就會出現紫色圓點，只要click一下，資料就會呈現。


政府話《見．識香港》以香港核心價值為主題，講出香港多元共融嘅一面，以及同世界各地緊密聯繫，除咗顯示香港旅遊好去處，亦有關於香港經濟資料、本地名人同趣談。