高達中大執教鞭

【明報專訊】民主黨李永達喺立法會選舉失利，但唔愁冇後路，啱啱至去咗突尼西亞冒險嘅佢，被中大社會科學學院睇中佢嘅政治經驗，下學期將到中大執教鞭，任教公共政策碩士課程，同經濟系副教授莊太量，以及前政務官、幫過公民黨梁家傑選特首嘅黃明樂做同事。


每周一堂公共政策

阿達以前跟開房屋及土地政策，但佢話唔會淨係教呢啲咁簡單，無論政治、選舉、貧窮、環保等範疇都會觸及，皆因校方畀佢好大自由度，讓佢可以自己設計課程喎。


為咗做好呢份工，阿達話連日嚟不斷做好最佳準備，「我識啲政策啫，但我都要重新睇過晒書同資料，又要準備powerpoint」。佢話今次係兼職教書，每周上一堂咁大把，「全職我都唔做啦，咁辛苦！」阿達係咪一個要求高嘅導師仲係未知之數，但據聞唔少學生都對佢教書有一定期望。佢又話，雖然已經冇做議員，但並無同民主黨脫離，每周都會返立法會幫手處理黨務同列席黨團。