皇仁校慶周一嶽料再高歌

【明報專訊】香港歷史最悠久嘅官校皇仁書院，150周年校慶活動橫跨咗成年，重頭戲會係今個星期日喺會展筵開190席嘅校慶晚宴。當晚預計有2400名校友及家屬出席，主辦單位皇仁舊生會會長于鎮康話，到時一定星光熠熠，由於皇仁盛產名醫，中大校長腸胃肝臟科醫生沈祖堯，前任及現任食衛局長周一嶽同高永文，中大醫學院院長霍泰輝到時會暫時「轉行」，揸咪一展歌喉幫手籌款，似乎周一嶽嘅成名作《忘不了你》可以再次encore喇！


于鎮康又話，作為「校友黨」6名立法會議員，石禮謙、胡志偉、梁繼昌、梁家騮、湯家驊同盧偉國早前亦預告有搞作，將會喺台上唇槍舌劍。


校友議員台上舌戰

除咗有校友上台表演，于鎮康話，場地佈置將會模仿校園設計，門口大閘當然唔少得，等大家都有回到校園時嘅感覺。皇仁仔當晚會傾巢而出幫手，做搞手、贊助食物、提供約40萬嘅大型顯示屏等，仲有現屆同學仔幫手招待。不過，大會話今次活動恕不招待與皇仁無關嘅人士，所以，特首梁振英、教育局長吳克儉唔好意思無份喇。