水晶郵筒見證郵政170年

【明報專訊】香港郵政噚日推出一套3款懷舊水晶郵筒，設計參照殖民地時代嘅本地郵筒，有圓柱狀、嵌牆式同橢圓形。Emily發現上有郵筒編號同皇冠等徽號，見證香港郵政170年歷史，488蚊一套；若市民想喺水晶座刻上自訂字句，套裝連刻字服務收650蚊，刻字以兩行為限，每行最多30個英文字母或18個中文字，數量有限，售完即止。


可自訂刻中英文字

呢套懷舊水晶郵筒造工好精緻，每款郵筒嘅細節特色都能突顯，係港人對港英殖民地時代嘅集體回憶。市民可以喺網上購物坊「樂滿郵」（www.shopthrupost.hk）訂購，喺下年1月3日前經網上預訂兩套或以上，可以免費得到原價40蚊嘅《香港郵筒掌故》一本，了解開埠至今嘅郵筒演變。若喺12月19日前訂購，香港郵政仲會喺下年2月8日前寄出套裝到府上。


市民亦可親到46間「郵趣廊」門市購買，詳情可致電香港郵政熱線2928 7110查詢，或瀏覽「樂滿郵」網站。