卿姐鬧長毛講「妾侍」

【明報專訊】民主黨劉慧卿唔鍾意社民連梁國雄喺議會講粗口大家都知，不過原來喺卿姐面前，仲有好多嘢係唔講得。長毛噚日就唔小心再次犯禁，事緣內會討論是否用《權力及特權法》成立委員會，調查梁振英僭建事件，長毛就質疑特首，嚟立法會又唔遵從議員要求，係當立會係「妾侍」。點知呢兩個字辣㷫卿姐，問長毛「點解咁鍾意講侮辱女性嘅嘢」，兩人隨即罵戰。


長毛問，「妾侍」唔講得，咁「暴君得唔得，佞臣得唔得？」，卿姐就話講呢啲嘢都唔啱。


「點解咁鍾意侮辱女性」

內會主席梁君彥呢個時候就話長毛離題，要求長毛講番是否成立委員會。點知Andrew唔講還好，一講就辣起幾把火，長毛炮轟佢話，「我畀人哋講咗我嘅時間都話離題？」


最終係長毛主動講番成唔成立委員會，否則個會都唔知點收科。