AO試題要就領匯表態

【明報專訊】Emily同事早前報道今年政務主任（AO）空缺多咗，令中籤率大增，但要做到政府嘅「天之驕子」，又有乜嘢要識？一年一度政務官筆試噚日舉行，Emily就聽到，之前立法會嘅熱門議題「回購領匯」成為考試題目，不過領匯英文名「The Link」就變咗「The Channel」，認真搞笑。


「The Link」變「The Channel」

話說喺題目裏面有個城市叫「Chinopolis」，呢個城市嘅北區，有好多新市鎮同資助房屋嘅。裏面嘅商場，原本由房委會管理，點知後來政府將呢啲商場賣咗畀「The Channel」，仲搞到物價貴晒，市民連個人用品同熟食都好難買到，賣嘢畀其他城市嘅人嘅店舖佔地仲急增4倍，大家係咪覺得熟口熟面？原因係情况差唔多同家嘅香港一模一樣！


至於問題係問乜？原來係有非政府組織要求回購領匯……呀唔係，係「The Channel」股份，你如何處理。據講，喺「Chinopolis」裏面，仲有六成幾人認為要處理呢個問題，五成幾人認為要回購，唔知政府係咪真係香港做過類似民調呢？


徵收零食稅 社會較少探討


真心支持回購「領匯」考生，見到呢條問題都可能好頭痕。至於另一條題目，就係徵收零食稅！唔知考生聽過未呢？其實有國家徵收朱古力稅等稅種，因為話零食易令人癡肥，咁即係向高脂不健康食物徵稅，但由於社會比較少探討呢樣，似乎要呢條得分都晤容易。