曾俊華默認財案宣傳片少驚喜

【明報專訊】政府家播緊宣傳片叫市民就施政報告同財政預算案提供意見，但唔少人都話今次嘅宣傳片悶爆，而財爺曾俊華都似多默認呢一點。佢喺網誌度講，近期手表廣告「不在乎天長地久」有好多人like，證明廣告效用大，好多人反而問佢今年預算案廣告片有乜「新橋」，咁係咪證明政府今次嘅宣傳片迴響唔夠呢？


財爺拋書包，話小說家馬克吐溫曾說﹕「Many a small thing has been made large by the right kind of advertising.（透過正確的廣告宣傳，很多小事情變成了大事情。）」原來財爺好鍾意睇電視廣告，有時候做到攰，會上YouTube搜尋「funniest commercials」，欣賞各地嘅有趣廣告。佢仲話，近日一個手表同一個珠寶品牌先後推出兩個「電影版」廣告，手法相近，吸引咗唔少網民討論比較，喺facebook贏得唔少「like」。


欣賞前年網民惡搞「回魂夜」

Emily講過財爺以前嘅預算案諮詢廣告片，有少少心思同創意，好似2010年嘅一輯，被網民「二次創作」，變成「曾俊華回魂夜版本」，財爺話撇開版權問題，都欣賞網民嘅創意同技巧㗎。不過，今年財爺「穩中求變」後，宣傳片變得平平無奇。財爺話，如果再玩創意廣告，或許要等2014年預算案諮詢喇。