團體偕貓咪促設動物警察

【明報專訊】呢排好多令人齒冷嘅虐貓案發生，好多人都提出要設立「動物警察」破案，噚日公民黨同一眾愛護動物團體人士就帶埋貓貓開記者會，要求設立動物警察。


香港非牟利獸醫診所代表麥志豪話，動物警察指受過相關專業訓練嘅警察，除咗偵查「動物案件」，當然仲有其他警隊工作，不涉額外警員編制。


幫警方諗埋點做

關注動物權益嘅佢哋仲構思咗動物警察嘅可行模式，包括喺全港六大警區分別設立一隊動物警察，或者喺全港警署嘅偵緝組選一隊做動物警察，而動物警察最理想係有飼養動物嘅經驗，可以負責埋教育市民嘅工作。


立法會議員毛孟靜話，社會對虐畜事件「零容忍」，又話家有關虐待動物嘅刑罰太輕，難以收阻嚇作用。佢認為若判刑過輕，律政司應該考慮提出上訴，要求加刑，令人明白虐待動物係嚴重罪行。