林大輝佛陀上身諷CY

【明報專訊】當日嚴辭批評對手唐英年僭建嘅梁振英（CY），今日因同一問題被各界追討，唔少人都笑言冇得唔信「報應」呢家嘢。「唐營第一猛將」工業界議員林大輝噚日仲佛陀上身，喺答問大會幫「大佬」唐英年出一口氣，話見到梁振英嘅遭遇，令佢諗起佢師父嘅名言﹕「昨天的因，今天的果；今天的因，明天的果。因果循環，報應不爽。」在場議員聞言都笑咗出嚟，最正係大輝仲雙手合十講番句﹕「阿彌陀佛。」


昔話唐唐僭建 今天「因果循環」

大講佛偈嘅大輝批評梁振英，上年底靜雞雞用磚密封咗「被擴建」嘅地下室，以為咁樣僭建就唔會存在，然後喺今年3月嘅選舉論壇指摘唐英年僭建，大輝就話「菩提本無樹，明鏡亦非台，本來無一物，何處惹塵埃」，話如果梁振英屋企冇僭建嘅話，何須大興土木封地庫，大可唔使有呢個舉動。


大輝又揶揄梁振英成日話自己「疏忽」，其實喺成件事，好多人「讚」佢處理上計算得好精密，以為「神不知，鬼不覺」。佢反問梁振英有無反省過失，同有冇評估中央會唔會對佢嘅誠信同管治能力有所動搖。


蔣麗芸勸CY賣屋 「唔使執手尾」

唐營向梁振英大加鞭撻，「梁粉」民建聯蔣麗芸（Ann）就「小罵大幫忙」，講故仔話有老華僑打電話去佢辦事處，又話唔少街坊同佢講，希望梁振英集中時間落實政綱，所以佢向CY「獻計」，建議佢賣咗山頂大宅，一了百了，就唔使再執手尾。唔少人聽到都滴晒汗，反問「唔通賣咗間屋就代表僭建唔存在？」不過，CY辜負咗Ann姐嘅苦心，話家唯一嘅計劃係執番好間屋嘅僭建。


另一建制派梁美芬仲無厘頭，佢話既然全港咁多僭建問題，叫CY不如成立專家委員會處理僭建政策，擺明「射歪」焦點，唔係追問CY嘅僭建事件。至於保險界陳健波，發問講僭建前先數CY政績，讚佢處理樓市、停雙非等，搞到幾乎全場嘩然。