單仲偕出馬選黨主席

【明報專訊】兜兜轉轉，由黃碧雲到胡志偉，再由胡志偉到單仲偕，民主黨主席人選睇嚟大局已定。早前表明部署參與換屆改選嘅現任黨副主席單仲偕，今日將帶佢嘅團隊亮相，正式宣布參選兼公布政綱，預料喺冇強勁對手下，黨主席寶座志在必得。


單仲偕嘅團隊包括「中生代」蔡耀昌同「乳鴿」南區區議員羅健熙，兩人將會問鼎兩個副主席職位。至於早前傳出同樣有意參選副主席嘅「80後」葵青區議員林立志同元朗區議員鄺俊宇，如無意外就唔會出戰。


早前講明唔選主席嘅胡志偉，已經報名參選副主席，咁樣，單仲偕嘅內閣豈不是同志偉打對台？據聞，「單閣」唔係有心同志偉營造對決嘅效果，不過估唔到志偉突然決定改選副主席。點都好，Emily認為有競爭嘅選舉先係好事，若然主席都有人爭就最好啦。


據聞，若果冇人同單仲偕爭，南區區議員區諾軒將會落場參選，促成黨內競爭。區諾軒係「左翼21」嘅成員，主張社會資源公平分配，而單仲偕嘅經濟立場幾乎係全黨最右，「最左鬥最右」，呢場主席辯論將會好精彩。