盛品儒無緣電視大戰

【明報專訊】近期動作多多、成日開記招嘅亞視執董盛品儒，噚日突然玩失蹤，拒絕中午出席立法會講亞視節目被投訴嘅會議後，夜晚又突然缺席香港電視主席王維基都有去嘅活動，令在場人士十分掃興。


盛品儒本來應承咗商台行政總裁陳志雲，出席該台搞嘅名人講座，同場仲有王維基，令好多人滿心期待一場面對面嘅「電視大戰」。到活動差唔多開始，盛品儒都未見蹤影，陳志雲仲同記者講佢會遲一個鐘到。點知到活動正式開始，盛品儒通知在場嘅公關，話未能出席，令講好咗嘅「電視大戰」未能上演。


魔童：同盛係好朋友

喺活動開始前嘅酒會，王維基同Emily講，佢同盛品儒係「好朋友」，雖則有年幾無見，呢一年來又發生咁多事，但都願意同佢合照。王維基仲好風趣咁話，若果盛品儒當面叫佢去「自首」，佢願意同盛一齊去警署咁話！佢又話，絕對唔擔心亞視因為有新電台競爭而執笠，因為據佢所知，亞視都唔係靠廣告收入維持喎。