迎海豹BB 小海豚夭折

【明報專訊】海洋公園每年都有唔少喜事，最新兩宗都係海豹產子，其中一宗係5歲嘅斑海豹Joyce，繼去年誕下一隻雄性斑海豹，前日再度誕下一隻小斑海豹。Joyce現正喺冰極天地後勤基地照顧小斑海豹。為免小斑海豹受到滋擾，公園暫未為佢量度體重及確定性別。早前公園另一隻港海豹Dash於3月24日誕下第3胎，小港海豹體重8公斤，現時兩母子均入住威威天地嘅海獅居。


海洋公園一面有好消息，另一面有壞消息。公園圈養嘅動物中，部分如海豚嘅下一代存活率一向偏低，噚日約凌晨1時，海洋公園動物護理團隊目睹13歲海豚Maya誕下嘅首胎小海豚無生命迹象。公園動物護理總監魏偉寶指出，圈養海豚首胎嘅存活率只有約40％，出現夭折係正常現象。至於Maya，家正在海洋哺乳動物繁殖及研究中心休養，佢嘅胃口同活動情况已逐漸改善。