中聯辦「資青」王志民主禮

【明報專訊】由一班建制二代、青年才俊組成嘅菁英會噚日舉行就職典禮，新一屆主席由立法會議員梁君彥囝囝梁宏正擔任，常任副主席就由全國政協委員盧文端個仔盧金榮出任，兩人嘅老竇喺政壇有一定地位，噚日兩個阿爸亦有現身典禮支持。政務司長林鄭月娥同中聯辦副主任王志民都有出席，兩人除咗發言，仲食埋餐飯先走，十分畀面。


林鄭：擬設5億基金幫青年創業

林鄭笑言經常喺呢類場合見到王志民，因為兩個都關心青年工作，強調無論國家定係特區，都對青年人寄予厚望，佢透露扶貧委員會將會討論設立5億元「社會創新及創業發展基金」，希望協助有需要嘅青年透過創意發揮潛能，希望最快今年內落實基金項目。


王志民就講笑話，佢同林鄭都係「資深青年」，佢話要香港繁榮穩定發展，包括要循序漸進推進民主，都係實現習近平主席所講嘅「中國夢」一部分，希望繼續做好團結青年人等工作。