鑑林帶團上潮州食好嘢

【明報專訊】建制派喺議會嘅投票表態上唔係好團結，但佢哋近年都會定期搞飯局，希望加強溝通、交流。立法會休會，唔少議員去咗旅行，但建制派亦繼續有聚會，不過唔係咩正式溝通，而係約埋一齊玩，Emily聽聞至少有兩場大型聯誼活動都喺今個月底舉行，包括「潮州美食4天團」同去遊船河。


詹培忠照捧場

Emily聽聞，3年前曾經搞過嘅潮汕團，會喺今個月22號再辦，領隊同樣係本身係潮州人嘅陳鑑林，至於「潮州怒漢」詹培忠雖然唔再係議員，但今次亦繼續捧場，據講會去4日，帶班議員去玩，當然一切食最好、住最好，去嘅只得建制派議員同家屬。


田少出私家艇請遊船河

至於人稱田少嘅自由黨田北俊，遊艇、靚車係佢至愛，佢就邀請一眾建制派，喺8月尾坐佢隻遊艇去西貢食海鮮、睇地質公園，再去埋大浪西灣游水，玩足半日，由於遊艇每次只能招待20幾人，所以田少好體貼咁提供咗3個日子，等議員自行選擇。