偲嫣曾破產 美芬籲勿歧視

【明報專訊】香港家長聯會李偲嫣喺周日旺角集會，形容罵警嘅林慧思老師「情緒失控」、應睇醫生，一時走紅，有傳媒就揭發20幾年前李偲嫣曾經破產。聘請李偲嫣做兼職項目專員嘅立法會議員梁美芬，噚日就喺facebook撰文力撐員工，問大家點解要歧視破產人士，仲話應該畀啲鼓勵破過產嘅人，令佢哋能重新振作。


偲嫣撤記招 哀子遭欺凌

梁博士喺fb好親切咁以Leticia稱呼李偲嫣，成篇文都無提過李偲嫣呢個中文名，梁博士話識咗Leticia好多年，知佢對教育同青年議題好熱心，所以邀請佢加入團隊，又話多年來Leticia都用part-time身分協助全職同事。


另邊廂，李偲嫣前日發晒稿通知傳媒，計劃噚日下午開記者會講吓佢被恐嚇嘅事，點知噚日中午Emily收到傳媒朋友嘅消息，話李徵詢律師意見後，決定取消記者會。繼早前佢臨時爽約去商台節目做訪問，噚日又甩底？其後李偲嫣發表聲明，批評有人抹黑，連佢個仔都喺網上受欺凌，佢本人就不斷收恐嚇電話，為此佢已報警，警方亦展開調查。