潮流變 電腦節似手機節

【明報專訊】第10屆香港電腦通訊節8月23日開鑼喇，不過隨住個人電腦銷情不斷下跌，真係主打賣個人電腦嘅參展商愈嚟愈少，700個攤位裏面，傳統賣電腦嘅參展商只剩低三成左右，「電腦節」變咗「手機節」！

得三成攤位賣電腦

電腦市道低迷，真係要搞搞新意思。為咗刺激市民消費意欲，除咗有上個月主辦單位香港電腦商會公布會喺會場推出現金消費券外，電腦節再加推「現金券變倍器」。即係話，你拎住30蚊現金消費券，可以將金額乘10倍，一秒變成300蚊！變倍器有×3、×5、×10，不過就只限指定產品，唔似消費券咁處處都可以用！


主辦單位呻經營難

Emily向主辦單位電腦商會主席余華強了解，佢話經營愈嚟愈難，全球電腦市場開始飽和，電腦參展商比10年前少六成！佢仲話電腦城以前好旺好爆，但近年開始有空舖，電腦雜誌變成電子雜誌，電子雜誌又變成手機雜誌，就知乜嘢先最賣得啦！

電腦商會創會會長張耀成都話，潮流改變，電腦嘅形態亦會變，電腦節都有唔少攤位賣手機周邊產品，好似機殼、手機保護貼、耳機、便攜式路由器，睇嚟電腦節係咪應該改名做手機節呢？