全運會授旗 CY戴膠表

【明報專訊】噚日特首梁振英（CY）喺禮賓府出席第12屆全運會香港區代表團嘅授旗儀式，佢雖然唔似一眾運動員同香港區代表團嘅籌委會代表咁著制服，不過Emily發現佢戴咗隻黑色膠表，唔知係咪想同年輕運動員打成一片？但Emily就唔肯定CY之前有冇戴過呢隻表。


今年香港會派出223個運動員，出戰8月31到9月12號喺遼寧舉行嘅第12屆全運會，總共挑戰20個比賽項目。香港代表團團長、民政事務局長曾德成就話，今年仲會有香港運動員出戰新設嘅高爾夫球項目。


出戰高球新項目

Emily諗，如果港隊喺高球比賽拎到獎牌，唔知粉嶺高球場嘅前途會點呢？不過無論如何，Emily都希望一眾運動員全力以赴，拎多幾面獎牌番嚟為港爭光。