英基總裁退休﹕爭資助最難

【明報專訊】英基學校協會（ESF）行政總裁杜茵妮（Heather Du Quesnay）做埋呢兩個禮拜就退休，臨走前會同老公去泰國玩兩個禮拜，之後返英國退休，佢話返到去可能會做義工。杜茵妮退休前要同政府談判資助問題，最後政府決定分16年取消資助，令佢畀家長批評。杜茵妮話，覺得學校同自己已經盡力，已經done a good job。

噚日佢約成班記者出傾偈，講下英基咁耐感受。佢同Emily講，最深刻同最艱難都係同教育局傾資助，但佢力讚英基學校協會主席唐家成，話佢非常努力為學校同政府爭取繼續資助。對於家政府決定分16年逐步削減資助，杜茵妮重複多次話唔容易，但係相信有能力面對。

佢話，家政府資助，已少過整體收入兩成，而且有16年時間，佢相信有足夠時間應付。雖然前排唔少家長不滿資助被削，又質疑校方無盡力，但佢話同大部分家長關係好好，仲話每個寫信畀學校家長，佢幾乎都見過。