仁哥證婚唔收錢

【明報專訊】唔少律師近年齋做證婚生意已經賺都笑，本身係律師嘅民主黨何俊仁原來都有證婚資格，但佢就話自己幾年來都未開過齋正式做生意。但係Emily明明記得，仁哥幾年前幫黨友涂謹申證婚，前排香港人權監察副主席莊耀洸結婚又係仁哥出動，點會無生意呢？但仁哥話，呢啲全部都係「友情價」，唔算係生意，而佢嘅「友情價」係唔收錢﹗


「全部係朋友 點收錢喎」

Emily查過，家一場半小時內搞掂嘅證婚儀式，動輒索價數千至近萬，仁哥話，自己一年同「十對八對」朋友證婚，Emily覺得咁咪賺少好多？仁哥就話，「全部都係朋友，點收錢喎」。


嚟緊社運界又有喜事，主角就係楊匡同內地維權人士劉沙沙，不過，二人婚期前夕，傳出劉沙沙喺內地結過婚，未辦好離婚手續，惹起一陣重婚疑雲。Emily聽聞今次又係仁哥證婚，但仁哥就話未得當事人同意，無證實係咪會幫手證婚。不過，仁哥話一般新人喺結婚前，都要宣誓無任何婚姻約束㗎﹗所以話，仁哥呢位證婚人雖然有時大頭蝦，但都幾有專業操守﹗