愛港之聲唱K賀特首 59歲

【明報專訊】噚日特首辦閘外忽然有一束花，不過大家唔好誤會係乜嘢「永遠懷念XXX」獻花，其實噚日係梁振英（CY）59歲生日呀！Emily喺度祝佢生日快樂，但究竟呢紮花係邊個送嘅呢，就唔知喇。


阿人憂CY心理不平衡

話說前日CY落區天水圍，有愛港之聲成員送咗紮花畀CY，仲叫佢唔好傷心、失望、恐懼。Emily噚日打畀愛港之聲主席高達斌，問佢哋係咪又送花，但高達斌話再送都無新意啦，而佢哋一班梁粉就自發組織去CEO Neway唱K，唱K都要去CEO（亦可作特首辦公室縮寫），梁粉真係有心。高達斌話，希望CY嚟緊一年繼續好似前日出席天水圍地區論壇咁堅強同強硬喎。


工黨主席李卓人噚日都祝梁振英生日快樂，阿人仲好關心CY咁話，見到對方前日態度突然硬起來，好似有啲心理不平衡，勸CY正視精神健康、多啲休息，唔好做到自己咁辛苦，最好就「生日快落台」啦。


生日願望實踐「家是香港」

CY噚日喺網誌就話收到唔少賀電同賀卡，仲有市民鮮花，話對各位心意絕對心領，仲話「如果問我的生日願望，我希望每位香港人都能安居樂業，實踐『家是香港』」。