陳健民講豎中指典故

【明報專訊】對住愛港力狂罵都可以斯文淡定嘅佔領中環發起人之一陳健民，原來都有「豎中指」嘅時候，佢自爆話試過有次開車畀人亡命「追尾」，佢絞低車窗豎起中指。「豎中指」算唔算粗鄙呢？陳健民就為呢個成日畀人「打格」嘅動作「平反」，話豎中指原同性器官無關，呢個動作有段古，可以追溯到15世紀英法百年戰爭末期。


球場粗口多 細個不愛踢波

陳健民喺facebook變咗講古佬，佢話英法百年戰爭，英國弓箭手令法軍損失慘重，當時法軍發誓喺擊敗英軍後，將英國弓箭手拉弓嘅中指斬斷，點知最終都係法國慘敗，當法軍撤退時，英國弓箭手對住法軍一齊舉中指，從此成為西方嘅侮辱手勢。


陳健民話自己講唔慣粗口，細個唔鍾意踢波，都係因為唔鍾意球場粗口滿天飛。不過，佢有次去內地調研時，為咗同的士司機暢談社會問題，唯有一齊爆粗，佢講笑話好驚訝聽到自己講嘢加插幾個生殖器官仍然好流暢。


至於一次真正嘅憤怒爆粗，就係有次佢喺內地出版嘅民間刊物畀內地政府查封，佢當時叫咗一聲「媽的」。聽完陳健民現身說法，市民對林老師嘅爆粗事件會唔會有另一番睇法？