港交所董事「避風」 業績順延

【明報專訊】尤特襲港，畀大部分打工仔一日或半日假，但要如常開工嘅人亦唔少，小琴見噚日各大小上市公司如期公布業績，即係話由董事會以至部分員工，都繼續開會同工作。之但係港交所（0388）董事會就好聽從政府呼籲，颱風期間盡量唔好外出，所以唔開董事會，原本噚日派中期成績表，就順延今日先揭盅。


有朋友笑港交所，國泰（0293）呢啲藍籌公司八號波都照樣開董事會同公布業績，港交所就擇日重賽，唔通係佢啲董事會成員特別身嬌肉貴？港交所發言人話，其實交易所前晚一早出咗通告，講明如果昨日朝早8點都未落波，董事就唔開會，亦唔公布業績，一早講晒畀大家知，等大家有個預算。至於點解唔嘗試用電話或視像會議開會，同埋點解其他上市公司董事又開到會，佢哋就唔評論喇。


發言人：一早預報畀大家知

其實小琴覺得，港交所延遲一日公布業績冇乜大不了，講真又唔係國情咨文、施政報告或財政預算咁，加上噚日冇市，遲啲派成績表影響不大；總好過有上市公司前晚已講明，噚日朝早喺酒店舉行嘅業績會風雨不改。可能班住喺酒店嘅阿總唔知道，8號波下要搵車搭殊不簡單，小琴對一班替佢哋工作嘅公關同埋去參加佢業績會嘅傳媒深表同情。


小琴百無聊賴下，打畀啲金融界友好傾吓偈，好似豐盛金融資產管理董事黃國英同埋法興環球股票產品策略師蔡秀虹，佢哋原來噚日都好深閨，冇約朋友打牌、唱K，可能佢哋平時對住個市已經夠晒刺激，難得一日額外假期寧願喺屋企唞吓。