民建聯訪加拿大 去107年歷史中華會館

【明報專訊】呢個暑假，民建聯主席譚耀宗率領幾名議員去咗加拿大外訪做宣傳，拜訪當地社團。隨團嘅陳恒鑌（Ben）話溫哥華好似香港，除咗有大量港式食物同茶餐廳、度度都係港人移民之外，令佢感覺到強烈嘅香港味道；而溫哥華傳媒一樣好港式，一早8點幾有電台phone-in節目，中午有主婦至愛嘅「都市閒情」式節目，佢話移民去溫哥華應該唔會有適應問題，只係似由市區搬去元朗咁。


陳恒鑌：移民如搬去元朗

外訪團喺加拿大當地13日，先後拜訪喺加拿大成立咗107年、擁有超過100個團體會員嘅「中華會館」，之後禮節式拜訪中國駐溫哥華總領事劉菲，了解中加貿易合作，以及加拿大嘅華僑服務。劉總領事話目前加拿大約有40萬華人，當中37萬來自內地同香港，餘下約3萬人來自台灣。民建聯就送咗本《民建聯20年史》畀劉菲。