環團「佔領中電」 促訂節能1％目標

【明報專訊】家明、小冰、 James 、阿Ling 、Jason同Leslie，年齡由21至39歲，佢哋都係普通香港市民，噚日跑到中電位於旺角嘅綠適天地靜坐。佢哋嘅目標一致，希望以和平佔領方式，換取中電承諾定出每年節能1％目標。


6義工「舒適天地」靜坐

綠色和平、綠色力量、世界綠色組織、街工及工黨等11個團體，早前聯署要求中電制訂每年節能1％目標，同埋撥款資助用戶節能，不過中電冇回應呢啲訴求。綠色和平於是招募咗6個義工，希望透過佔領行動爭取同中電高層見面。


中電出稿表遺憾

不過，6個義工噚日早上11點半一直坐到天黑，中電高層連影都唔見。中電公關話，企業發展總裁莊偉茵唔喺香港，但又唔搵第二個高層出嚟，只係出咗篇新聞稿，對佔領行為表示遺憾，又話節能要以務實可行做大前提，無回應點解唔可以節能1％。直至噚晚9點，佔領行動仲未完，綠色和平資深項目主任古偉牧回應Emily話﹕「唔承諾傾資助方案，唔走。」