永隆：工行是第一間提收購

【明報專訊】近日創興銀行（1111）賣盤嘅傳言滿天飛，那邊廂，2009年初賣咗比招行（3968）嘅永隆，最近出咗本書紀念創立80周年，當中有個章節大爆當年被收購嘅故事。唔講唔知，原來當初第一個主動出擊話要收購永隆嘅，唔係招行，而係工行（1398）。


航班上遇上工行總裁

書中寫道，永隆嘅創辦人伍氏家族，面對市場競爭同日益嚴格嘅監管要求，感覺經營壓力愈嚟愈大，漸漸萌生賣盤念頭。命運亦為佢「牽紅線」，時任永隆行政總裁嘅伍步謙，2006年有次響北京飛往香港嘅航班上，竟然咁啱遇上當時工銀亞洲嘅行政總裁朱琦。兩人傾偈時，朱琦對永隆表現出極大興趣，伍步謙憶述︰「我同朱行長開玩笑，你好似照X光一樣打聽永隆嘅各種事情。」


後來有5間銀行成為競購永隆嘅買家，包括工行、建行、交行、招行同澳新銀行，一輪投標後，工行、交行同澳新入圍；但因交行後來忽然宣布退出，永隆先再邀請招行加入競賽，勢估唔到最終招行打低晒對手，成功買下永隆。