美即獲收購劉央開心晒

【明報專訊】內地面膜生產及零售商美即（1633）前晚宣布獲歐萊雅集團提出收購，全城最欣慰嘅可能並非美即管理層，而係近日畀中金再生（0773）搞得焦頭爛額嘅女股神劉央。歐萊雅提出25%溢價收購美即，對於喺美即上市前就已入股、目前持股8.8%嘅劉央來講，意味住順利套現約6億現金。咁都算屢次遭民企股背信棄義後，搵到些許安慰。


歐萊雅建議嘅收購價為每股6.3元，較美即停牌前溢價25%。噚日復牌後，美即飈升19%至6.01元，但距收購價仍留有5%折讓。


美即話，賣盤已獲董事會同埋6名主要基金股東支持。其中自然包括劉央。


歐萊雅收購 溢價25%

已多日不見傳媒嘅央姐噚日獻聲電視。上一次小琴打通央姐電話，都係年初時佢旗下一隻健康護理基金大賺15%跑贏恒指嗰陣。


劉央噚日話：「從一間默默無聞的公司，成長到被國際企業溢價收購的公司。我感到非常欣慰，已經非常欣慰了。」


美即於2010年9月招股，上市前劉央旗下兩個私募基金以每股作價1.37及2元入股。


上市後，劉央又以4至4.5元掃貨。如今持股8.75%，有望套現5.7億元。


「我感到非常欣慰」

響去年10月最先提出美即具有被收購可能嘅交銀國際分析員王惟穎（Summer）同小琴講，一眾基金股東中劉央嘅入股價係最平嘅，平均大概2.75元，即平均賺1倍以上；但若以上市前投資持有至今計，則最多賺3.6倍。


至於噚日收市仍有折讓，Summer指應該係源於交易有待商務部批准而致。


email: [email protected]