故宮文物展陸續來

【明報專訊】民政事務局長曾德成噚日寫blog，公布繼藝術館同歷史博物館後，會有多幾間博物館同故宮博物院合作展覽，涵蓋文物包括茶具、廚具、西洋奇器同鐘表珍寶。佢仲話曾經有人提議喺香港設故宮博物院分館，期望令中華文化走向世界。


曾局長話早前香港同故宮博物院簽咗合作意向書，建立合作機制，等將來有更多國家文物能透過機制訪港。佢大爆嚟緊有4個故宮文物展，包括喺茶具文物館搞嘅「皇家茶具——故宮博物院藏茶具精品展」、文化博物館嘅「皇家廚房」、科學館搞嘅「西洋奇器」同埋「故宮博物院藏鐘表珍寶展」。佢話故宮文物多到展唔晒，要喺北京北面建新館，又話有識之士曾建議喺香港搞分院，一如羅浮宮喺朗斯搞分館咁。


■小啟﹕李先知專欄「聞風筆動」暫停5天，下周一復刊。編輯部