論壇15人發言 6個區議員

【明報專訊】特首梁振英（CY）第二次落區舉行論壇，由於今次觀塘嘅場地比上星期嘅天水圍更細，市民如果要入場，唔通宵排隊都好難有飛。平時都有唔少機會見到官員甚至特首嘅區議員，亦唔放過呢次機會，雖然無幾多個區議員通宵排隊，但喺論壇上，15個發言者當中，就有6個區議員、1個前區議員抽中發言。


民政事務總署話，佢哋喺3場特首落區活動中都唔會預留座位畀人，區議員都唔會有飛，其中獲抽中發言嘅民建聯深水埗區議員陳偉明就同Emily講，佢朝早7點去排隊；但聽聞有人凌晨5點去排都攞唔到飛，唔知陳偉明係點攞到飛入到場。


4副局撐場 CY：事前唔知

曾喺中聯辦工作嘅觀塘區議員黃春平亦獲抽中發言，佢就關注政府建屋後嘅配套問題，仲有個好大諗頭嘅建議畀CY，要求政府興建港鐵「觀塘北支線」。


CY噚日落區帶埋兩個局長到場，其實現場亦有4個副局長，包括教育局嘅楊潤雄、運輸及房屋局邱誠武、財經事務及庫務局梁鳳儀同環境局陸恭蕙，CY多次提到事前完全唔知道佢哋會現身，又話會鼓勵問責官員多接觸市民云云。不過有政府中人話，早前政府內部有呼籲副局長得閒就去；噚日亦有專人接待副局長入場。


《主場新聞》網媒被拒入場

噚日好多記者喺場內採訪，亦惹來新聞審查疑團。新聞處人員只係准「主流傳媒」入場，而《主場新聞》及多個網絡傳媒嘅記者都被拒入場採訪，《主場新聞》話新聞處人員冇交代原因，只係不斷話「你可以投訴」。