周一嶽憶回應粗口病人

【明報專訊】林慧思老師事件全城熱議，平機會主席周一嶽（York）噚日上民主黨主席劉慧卿個網台，就被問覺唔覺得粗口係暴力，York話其實唔少親友都會講粗口，但佢覺得有少少忍耐就最好，又話「如果大家拗緊交」，咁粗口都「一定係暴力一部分」。York做過醫生，佢話梗係遇到病人講粗口，不過佢就教路點應付，會叫病人「唔好咁暴躁，只需要講病徵」，咁就得囉喎。


卿姐成日畀人諷刺佢係「和理非非」，即係「和平理性非暴力非粗口」，佢噚日自己都認，話網民都好關注佢對粗口嘅睇法。


做咗平機會主席4個幾月，York話已經覺得「過咗試用期」，亦見咗40至50個關心同性戀歧視問題嘅團體，「社會已有共識不同性傾向不是病」，遲啲平機會都希望向性傾向歧視問題小組委員會表達意見。


指社會共識重要

至於少數族裔童入學問題，York批評政府，要少數族裔學童入讀指定學校係分化香港嘅小朋友，做法「行唔通」，會要求政府檢討或廢除。


York又提到關心社會紛爭不斷，形容香港已去到「交叉路」，點將唔同意見集合為共識好重要，雖然只係做平機會，但社會上若有太激烈嘅言論或不理智嘅行為，佢亦會出聲。