兩童海洋公園隨處便溺

【明報專訊】喺海洋公園隨處小便？有圖有真相，有網民話前日去海洋公園，見到兩個小朋友遊客喺公園內周圍小便，張相更被網民瘋傳熱議。睇張相兩個小朋友由家長陪同，估計有可能係搵唔切廁所，喺植物旁邊「就地解決」。有網民仲懷疑佢哋係內地遊客，但Emily無從考究。


海洋公園證實，相中地點係園內景點「香港老大街」入口，話對事件關注，希望遊客唔好隨處便溺，仲話老大街步行2分鐘就有廁所。