芷君讀書器材 郭炳聯全包

【明報專訊】感動市民嘅失明聽障女生曾芷君，咁多年嚟都係靠雙唇讀書，佢喺今屆文憑試考到3優，中大翻譯系收咗佢。


噚日Emily知道，新地聯席主席郭炳聯睇到芷君嘅故事後好感動，即刻打畀英華女校校長，問芷君有咩需要。校長之後畀咗張清單佢，列出芷君要買嘅器材。郭炳聯見到後，二話不說上個禮拜簽咗張支票，捐咗差唔多22萬畀芷君買器材。


受感動 打畀英華開支票

清單上面嘅器材，包括打印凹字嘅打印機同掃描器等一系列嘅儀器，仲包括埋特製軟件。Emily聽講，郭炳聯遲啲想去探芷君為佢打氣，因為知道芷君嘅成就得來不易，希望芷君克服面前嘅重重困難，展開人生另一美好階段。


原來芷君同新地好有緣，之前芷君喺心光學校讀書時，一直有攞獎學金，原來呢個獎學金就係由郭炳聯提供嘅，連郭炳聯自己都唔知。


基金留錢請人助教材電腦化

英華副校長曹港生話，芷君好多謝郭先生嘅支持，英華幫芷君成立嘅基金，暫時未知家有幾多錢，佢話基金其中一部分會預留聘請兼職助手，幫芷君將所有學習教材電腦化。