賺個漢堡 港人要做半粒鐘

【明報專訊】相信好多人都想知道，自己份薪金喺世界上係咩水平，金融服務公司ConvergEx Group就用「巨無霸指數」衡量世上各國嘅最低工資。佢哋比較各地工人，喺最低工資下要做幾耐先買得起一個巨無霸漢堡包。結果發現最低工資水平最高嘅係澳洲，約16.88美金，只要工作18分鐘就可買得起一個巨無霸，之後依次係新西蘭、法國同加拿大。


同日加並排第4

至於香港就要做半粒鐘，同日本並列第4，快過美國嘅36分鐘。不過，一樣係「獅子山下」，西非小國獅子山嘅情况就同香港好唔同，嗰度嘅最低工資係0.03美元，即兩毫幾子港幣，攞最低工資嘅工人，要做足136粒鐘先至買到一個巨無霸，以每周返工40個鐘計，等於連返3個幾星期。印度同中國喺大規模經濟體中排最尾同尾二，買一個巨無霸分別要工作5.8同3.1小時。


除咗「巨無霸指數」，瑞士銀行上年推出「iPhone指數」，睇吓各地平均要工作幾耐先至買得起一部16G嘅iPhone4s，港人平均要53個鐘，排26位，最快嘅係瑞士蘇黎世，22個鐘。